Civîna Encûmena Niştimanî ya Kurd li Sûriyê (ENKS) ku duh sibehê destpê kiribû, wê îro jî berdewam be. Di civîna duh de çend biryar hatine standin.\
\
Peyamnêrê Rûdawê li cihê civînê li bajarê Qamişlo ragihand ku Civîna ENKSê bi tevlîbûna endamên herêma Cezîrê û bêy amadebûna endamên herêmên Kobanî û Efrînê hat lidarxistin.\
\
Li gor zanyariyên ku peyamnêrê Rûdawê dane, di civîna duh de her du belgenameyên siyasî û rêkxistinê yên taybet bi kongreya sêyemîn a ENKSê hatin amadekirin.\
\
Derbarê kongreya sêyemîn de ku biryar bû di 13ê vê mehê de bê lidarxistin, civînê biryar da ku kongreya ENKSê heta piştî kongreya Cenêv2 bê paşxistin û ji bo diyarkirina kongreya xwe, ENKSê wê di 10ê çileya sala bê de civînekê li dar bixe.\
\
Neteweyên Yekbûyî roja 22yê çileya sala 2014an wek diyarkiriye ji bo lidarxistina kongreya Cenêv2, lê heta niha nediyar e bê kongre wê di roja diyarkirî de bê lidarxistin an na.\
\
Di civînê ENKSê de herwiha biryar hat standin ku eger yek şanda opozîsyonê di Cenêv2 de beşdar bibe, wê demê ENKSê jî wê tevlî wê şandê biçe Cenêvê.\
\
ENKSê herwiha tekez kir ku divê hevpeymaniya opozîsyonê rêkeftina digel ENKSê de ya derbarê doza kurdî de têxe nav nêrîna xwe ya ku wê pêşkêşî kongreya Cenêv2 bike.\
\
Peymanêrê Rûdawê herwiha got ku civîn wê îro berdewam bibe û têde wê çarenivîsa Desteya Bilind a Kurd (DBK) bê gotûbêjkirin û helwesta dawî jî derbarê beşdariya hinek partiyên ENKSê di rêveberiya demî ya Rojavayê Kurdistanê de bê dayîn.\
\
Rêveberiya demî di 12ê meha borî de ji aliyê PYDê, 2 partiyên ENKSê û çend partiyên din hat ragihandin.\
\
ENKSê ku yek ji pêkhateyên hevpeymaniya opozîsyonê ye, ji 14 partiyên Kurd, gelek rêxistinên ciwanan û kesatiyên serbixwe pêk tê.\
Yekemîn kongreya ENKSê di 26/10/2011 de li bajarê Qamişlo hat lidarxistin.
